2017 qaammat januaarimi pisortat atualinnginnermi ulluunerani neqeroorutaanni meeqqat 3.502-t allatsissimapput, taakkunannga meeqqat 0-inik ukiullit 191-it, 1-2-nik ukiullit 1.345-it, 3-5-inik ukiullit 1.950-it aammalu meeqqat arfinilinnik amerlanernilluunniit ukiullit 16-it. Taamaasilluni meeqqat 0-5-inik ukiullit tamakkerlutik 74,4 procentii atualinnginnermi ulluunerani neqeroorutini allatsissimapput. Amerlassutsit kisinneqarnerisa takutippaat meeqqat atualinnginnermi ulluunerani neqeroorutini allatsissimasut agguaqatigiissinnerat, innuttaasuni meeqqat tamakkerlutik amerlassusaannut naleqqiullugu.

 

Titartagaq 1. Meeqqat atualinnginnermi ulluunerani neqeroorutini allatsissimasut amerlassusaat, kommunit aammalu immikkoortortaqarfiit malillugit

Najoqqutaq: http://bank.stat.gl/OFNUKN1

 

Amerlassutsimut kisitsinermi meeqqat atualinnginnermi ulluunerani neqeroorutini allatsissimasut 0-5-inik ukiullit aammalu 6-inik ukiullit ataasiakkaat tamakkerlugit ilaatinneqarput. Innuttaasuni meeqqat 0-5-inik ukiulinnut naatsorsorneqarput, 6-inik ukiullit ataasiakkaat allatsissimasut ilanngullugit.

 

Pisortat atualinnginnermi ulluunerani neqeroorutaanni sulisut

2017-imi pisortat atualinnginnermi ulluunerani neqeroorutaanni piffissaq tamakkerlugu sulisutut atorfillit 1.095-iusimapput. Atualinnginnermi ulluunerani neqeroorutini sulisut tamakkerlutik arnanik sulisoqarajunnerupput, 2017-imilu arnat piffissaq tamakkerlugu sulisut 1.059-usimapput angutillu piffissaq tamakkerlugu sulisut 37-usimallutik.

 

Paaqqinnittarfinni sulisut eqimattanut tallimanut agguaassimapput: Pisortanut, perorsaasunut, perorsaanermi ilinniarsimasunut, perorsaasunut ikiortinut aammalu igaffimmi eqqiaanermilu sulisunut. Pisortat aammalu igaffimmi eqqiaanermilu sulisut tapersersuisutut/ikorfartuisutut sulisunik taaneqarsinnaasut sulisut tamakkerlutik 20,5 procentiinik annertussuseqarput. Perorsaasut, perorsaasutut ilinniarsimasut aammalu perorsaasunut ikiortit tamarmik meeqqanut paaqqinnittutut sulisunik (meeqqerisutut) naatsorsorneqarput. 2017-imi meeqqerisut 16,3 procentii perorsaasuupput, 31,3 procentii perorsaanermik ilinniarsimasuullutik aammalu 52,4 procentii perorsaasunut ikiortiullutik.

 

Titartagaq 2. 2017-imi meeqqanut paaqqinninnermik sulisut, amerlassusaat aammalu procentinngorlugu agguaqatigiissinnerat

Najoqqutaq: http://bank.stat.gl/OFNUKN1

 

Meeqqat meeqqerisumut ataatsimut amerlassusaat

Meeqqat ukiuini agguataarsimasuni assigiinngitsuni sanilliunniarlugit aammalu meeqqat meeqqamut paaqqinnittumut ataatsimut kisinniarlugit meeqqat amerlassusiisa uuttuutaannik kisitsisoqarpoq. Periaatsip immikkoortuani taaguut annertunerusumik nassuiarneqarpoq. Tunngaviusorli tassaavoq meeraaqqerivimmiittoq ataaseq 1,67-inik meeqqat amerlassusaannut uuttuuteqartoq, meeqqerivimmiorlu ataaseq aamma meeqqat amerlassusaannut 1-imik uuttuuteqarluni. 2017-imi nuna tamakkerlugu meeqqat amerlassusiisa uuttuutaat meeqqerisumut ataatsimut agguaqatigiissillugu 5,2-usimavoq. Meeqqat meeqqerisumut ataatsimut amerlassusaannut meeqqat sulisullu akornanni pissutsit apeqqutaasarput, assersuutigalugu amerlassusaannut kisitsit annikippat meeqqat ikinnerunerannik imaluunniit sulisut amerlanerunerannik peqquteqarsinnaavoq.

 

Titartagaq 3. Atualinnginnermi ulluunerani neqeroorutini meeqqerisumut ataatsimut meeqqat amerlassusiisa uuttuutaat, kommunit aammalu immikkoortortaqarfiit malillugit

Najoqqutaq: http://bank.stat.gl/OFNUKN1

 

Meeqqanut sulisunullu naatsorsuutit tamakkerlugit

Tabel 1.-imi meeqqat amerlassusaat ukiuinut tulleriaarlugit aammalu piffissaq tamakkerlugu sulisut suliaqarfinnut kommuninullu immikkoortiterlugit naatsorsorneqarput. Taamatuttaaq kisitsisaataasivimmi immikkoortortaqarfik, neqeroorutiniittut aammalu najugaq malillugit naatsorsuutit takuneqarsinnaapput.

 

Tabel 1. 2017-imi meeqqat ukiuinut tulleriaarneri aammalu sulisut, kommunit malillugit

	Katillugit	Kommune Kujalleq	Kommuneqarfik Sermersooq	Qeqqata Kommunia	Qaasuitsup Kommunia
Meeqqat ulluunerani neqeroorutiniittut tamakkerlutik .....	3.502	400	1.383	659	1.060
Meeqqat 0 ukiullit ...............................	191	17	68	49	57
Meeqqat 1-2-nik ukiullit ...........................	1.345	171	530	244	400
Meeqqat 3-5-nik ukiullit ...........................	1.950	212	782	364	592
Meeqqat 6-inik ukiullit qummullu ....................	16	0	3	2	11
Pisortat .......................................	66	9	22	15	20
Perorsaasut ...................................	142	8	64	24	46
Perorsaasutut ilinniarsimasut .......................	272	49	93	53	77
Perorsaasunut ikiortit ............................	456	41	214	86	115
Igaffimmi eqqiaanermilu sulisut .....................	159	28	54	18	58
Piffissaq tamakkerlugu sulisut ......................	1.095	135	447	196	318
Meeqqat amerlassusaasa uuttuutaat ................	4.526	525	1.782	854	1.365
Perorsaasut meeqqanut paaqqinninnermi (pct.) ........	16,3	8,1	17,3	14,6	19,5
Meeqqat meeqqerisumut ataatsimut amerlassusaat .....	5,2	5,4	4,8	5,3	5,7
Meeqqat 0-5-inut allatsissimasut amerlassusaat (pct.) ....	74,4	76,2	74,8	86,1	67,7
Ulluunerani neqeroorutiniittut ......................	132	14	45	21	52

Najoqqutaq: http://bank.stat.gl/OFNUKN1